Stručno povjerenstvo u sastavu Nila Kuzmanić Svete, Marina Čapalija i Dunja Kalilić proglasilo je tri najuspješnija pripovjedača ovogodišnjeg Dječjeg Pričigina. Prvo mjesto osvojio je  Gianni Galinović, 3. razred OŠ Pučišća s pričom Oponki i patike. Njegova mentorica je Željka Martinić, učiteljica razredne nastave.

U nastavku možete pročitati priču, a ako je želite poslušati, kliknite ovdje.

OPONKI I PATIKE

Jo san strošno kurjuož i uvik piton store none ča je i kako je nikal bilo.

Lako ti je storu nonu užgat!?

Olma puočme govorit da je uvik bilo tieško prihronit se, apožito vega rata, kal ni bilo nišesa za izist, njonka za lik. Ona je jednon put, kal non se nojmlaji sin nadu ol gloda i debulice, skupila sve zloto ča ga je u kući imala: rukuovni prsten, roćine i kadienicu ča non je muž darovo, bracolet i medajicu ča su ćeri doli za kršćienje – sve vridno ča je muogla skupit – ne bi u šaku stalo. I išla je u Split na Pazor, da non to jelna Vlahinja zamini za pulientu ol frmentuna. Vlahinje su dovale "žuto za žuto". I tako je nona za šaku zlota dobila šaku puliente. I cili je život proklinjola nu Vlahinju: "U gujku ti ostalo moje zloto, dabuojda!"

Znala je da dušu griši i da ni lipo kliet, ma opet – ko će odolit!

A nuono govori da su dica nikad uvik bosa hodila. Nikor ni pito je hi badodu stinje. Kal bidu se dica požalila da nimodu postoli, stariji bidu olgovorali:

"Dite moje, če ćedu ti postoli, zimi ni guj, liti ni zima, onda – čo!?"

Ma, kal bi duošlo vrime da se dite upiše u skulu, vajalo je jemat postole. Bare jelne u kući, kojega bilo broja. Činile su se doma, ol kože.

Ma ko će dat kože!

Ol kojie kože?!

Da bi nuono dobi oponke za u skulu, vajalo je ubit tovara. Jelniega storega, ča je jedva hodi, ma opet – bi je dil fameje.

Vele ti je truda podnila to bidno beštija!

Kal je nuono dobi oponke ol tovara, s lipon zavrnuton punton, gledo hi je ko oči u glovi. Zato če su vridne. I još veće zato ča su od njegovega tovara.

Parilo mu se da ga tovor na škini nosi dokle je u njima gazi. Somo če nin ne bi reko: "Šo, moje oponke, de! Još malo i duošli smo!"

Voli hi je i zato ča je mogo coknut bubanicu bez da mu se rascvate i prokrvori veli prst na nozi! Ča se tiče polplatih – tvrdijo je bila njegova koža nego koža od opanok. Mogo je trkat po škajima bržije i lašnje nego u oponkima.

Obo svemu temu san misli niki don dokle san gledo svoje nove Adidas patike.

Gianni Galinović, 3. razred

Mentor: Željka Martinić

OŠ Pučišća, Pučišća