Učenik šestoga razreda Pino Vrandečić sudjelovao je na festivalu u pratnji svoje mentorice Maje Ćapin. Svojim nastupom i pričom «Jo govorin pučiški» oduševio je publiku i prosudbeno povjerenstvo te tako osvojio prvo mjesto. Pino je već nekoliko puta nastupao na Pričaginu, a dva puta je nagrađen. Bravo Pino!

U nastavku donosimo i pobjedničku priču, za one koji nemaju problema s čitanjem i razumijevanjem čakavice :)

Jo govorin pučiški

U nos,  vuode u Pučišćima, malo koju zimu imo sniga. Jedino, ča diguod zabili Vidovu goru po ga idemo vidit, toliko da nan paso fantazija.

I tako, kal smo čuli da je u Zagrebu po veli snig, olma smo se jovili rojocima da čujemo kako su.  A za reć pravo, i za vidit bidu rekli da neka za zinske praznike duojdemo malo u njih.

Znote, oni svako lito duojdedu u nos.  U  kući nas  bude puno po je uvik nikega batibuja.

Nona bude štufa svega, da kal će svršit ovi burdil, jedva čekon da puočne skula! 

Vididu i naši Zagrepčani da nami ni lako prihrlipit lito po se pusto skužojedu i zafalijedu kal griedu ća.

Tako, nisu muogli s manjin a da sada  ne zovedu oni nos u Zagreb.

Judi vesieja. Mater je išla na internet vidit kal vozi autuobus da ga moremo ćapat rovno iz trajekta, a tako i nose. Jer ko ga ne ćapomo, va ostat spat u Splitu, a onda bi vajalo zvat još jedne rojoke po i njima bit obligon.

E, kal smo to sve lipo sjuštali, jovili smo se u Zagreb da nas znodu čekot i počeli smo se parićovat. Izvukli smo sve nojdebjega ča smo imali: bunde, kape, rukavice i šjole, dugaške mudonte i guće, a nona je rekla da uzmemo i pidjame ol špunje jer da ne znomo mi če Zagreb. Ča ću van govorit, tri puta smo minjali valiže jer nan, špale velega imbuja, ni muoglo sve stat.

U putu je sve dobro pasalo, jedino ča nas je nona zvola svaku puo ure i ni nan virovola da su puti čisti i da ni leda. Kroz ponistru ol autuobusa gledoli smo snig i guštali dokle su nan isprid očiju pasovali letrati, ko sa božićnih kartulinih. Jedva smo  čekoli  duoć u Zagreb.

Kal smo arivali, još  je bi don i zasjalo je sunce. Olma smo izošli isprid zgrade u park za učinit snješkota. Tuote je bilo i druge dicie, po smo se brzo sprijatejili.  Ki meni je duošo jedon moli i pito me kako se zoven.

 Pino,  s Broča, a ti?

Fran, ja živim ovdje u Zagrebu.

I tako smo se jo i Fran sprijatejili i svo vrime se skupa igrali. Činili smo balote ol sniga i jedon drugega bubali, ma lumbardali.  Uon je govori po svoju, a jo po moju. Sve smo se razumili.

Ujedonput, Fran je ćapo malo žešći zalet  i nako, muški,  potiego me u glovu. Mogu van reć da me zabolilo, ma nemilo. Suze su mi izošle na oči. Fran se začudi.

No, kaj ti je sad?!

Čo, kaj mi je sad!? Čoviče, potiego si me u tiempla, sve mi se zamantalo!

Kaj!??? Kojim ti to jezikom pričaš?!!

 Da kojin, bome pučiški!

Glova me još bolila, ali srića da mi smont ni puno duro po smo se još igrali.

Tuda je pasovala njegova mater i duošla je ki nami. Pitala je Frana da s kin se to igro!

Ovo je moj prijatelj Pino. Znaš on je sa otoka Brača i govori - po češki!

Pino Vrandečić, VI. razred

OŠ Pučišća